به‌پێی هه‌واڵی ئاژانسه ته‌كنه‌لۆژییه‌كان، له توێژینه‌وه‌یه‌كدا كه له به‌ریتانیا ئه‌نجامدراوه، له‌نێو سه‌رجه‌م تۆڕه كۆمه‌ڵایه‌تییه‌كاندا كه خه‌ڵك به‌كاریان ده‌هێنێت، دووانیان مه‌ترسیدارترینن. به‌پێی زانیارییه‌كانی كه له‌باره‌ی ئه‌و توێژینه‌وه نوێیه بڵاوكراوه‌ته‌وه، هه‌ردوو تۆڕی كۆمه‌ڵایه‌تی (ئینستاگرام و سناپ چات) مه‌ترسیدارترین تۆڕن و زیانی زۆر به به‌كارهێنه‌رانیان ده‌گه‌یه‌نن و كاریگه‌ری نه‌رێنیان له‌سه‌ر گه‌نجان به‌تایبه‌تی هه‌یه. توێژه‌ران رایانگه‌یاندووه، به‌شێكی زۆری گه‌نجان له سه‌رجه‌م وڵاتان ئه‌و دوو تۆڕه كۆمه‌ڵایه‌تییه به‌كارده‌هێنن و زۆرترین كاتی خۆیانی پێ به‌سه‌رده‌به‌ن، به‌ڵام زۆر به‌كارهێنانی ئه‌و دوو تۆڕه‌ش ده‌بێته هۆی هیلاكبوونی به‌كارهێنه‌ران و كه‌مبوونه‌وه‌ی كاتی خه‌ویان، ئه‌مه جگه‌له‌وه‌ی زیان به چاو و مل ده‌گه‌یه‌نێت به‌وپێیه‌ی زۆربه‌ی كاته‌كان مۆبایله‌كانیان به‌ده‌سته‌وه‌یه‌و به شێوازێكی ناڕێك داده‌نیشن و به‌كاریده‌هێنن. هه‌ربۆیه دایكان و باوكان ئاگاداركراونه‌ته‌وه كه تا ده‌توانن كاتی دیاریكراو بۆ منداڵه‌كانیان دابینبكه‌ن بۆ به‌كارهێنانی ئه‌و دوو تۆڕه كۆمه‌ڵایه‌تییه له‌پێناو پاراستنی ته‌ندروستیان و دوورنه‌كه‌وتنه‌وه‌یان له خوێندن. جێی باسه، هه‌ردوو تۆڕی كۆمه‌ڵایه‌تی (ئینستاگرام و سناپ چات) زۆربه‌ی گه‌نجان به‌كاریانده‌هێنن، ئه‌مه جگه‌له‌وه‌ی كۆمپانیاكانیشیان له ركابه‌ریدان و به‌رده‌وام تایبه‌تمه‌ندی نوێ و ناوازه‌ی بۆ زیاد ده‌كه‌ن تاوه‌كو بتوانن زۆرترین به‌كارهێنه‌ر بۆ خۆیان رابكێشن. خاك - لانه كاشان س/ ئاژانسه‌كان
created by Avesta Group and powered by Microsoft Azure