به‌هۆی هه‌بوونی كه‌سانی خوار 18 ساڵ و پابه‌ند نه‌بوونی به مه‌رج و رێنماییه‌كانی كاركردن، لیژنه‌كانی قائیمقامیه‌ت كافتریای جێژوانی یاران داده‌خات. له‌لایه‌ن لیژنه‌ی ریستۆرانتی سه‌ر به لیژنه هاوبه‌شه‌كانی قائیمقامیه‌تی سلێمانی و به‌هۆی هه‌بوونی كه‌سانی خوار 18 ساڵ له شوێنه‌كه‌یداو پابه‌ند نه‌بوونی به مه‌رج و رێنماییه‌كانی ته‌ندروستی و گه‌شتوگوزار كافتریای جێژوانی یاران داده‌خرێت. پێشتر لیژنه هاوبه‌شه‌كانی قائیمقامیه‌تی سلێمانی سه‌رجه‌م گازینۆ، كافتریا، كۆفی شۆپی كێشانی نێرگه‌له، فرۆشیاران و یانه‌كانی خواردنه‌وه ئاگاداركراونه‌ته‌وه رێگری له كه‌سانی خوار 18 ساڵ بكه‌ن له هاتوچۆكردن بۆ شوێنه‌كه‌یان و نێرگه‌له‌و خواردنه‌وه‌یان پێشكه‌ش نه‌كه‌ن، به‌پێچه‌وانه‌وه شوێنه‌كه روبه‌رووی داخستن ده‌بێته‌وه. جگه له هه‌بوونی كه‌سانی خوار 18 ساڵ كافتریای جێژوانی یاران، پابه‌ند نه‌بووه به مه‌رج و رێنماییه‌كانی ته‌ندروستی و مۆڵه‌تی كاركردنی له گه‌شتوگوزار وه‌رنه‌گرتووه هه‌روه‌ها كامێرای چاودێری له شوێنه‌كه‌یدا دانه‌ناوه كه یه‌كێكه له مه‌رجه‌كانی كردنه‌وه‌ی ئه‌و شوێنانه بۆ كاركردن. به بڕیاری قائیمقامی سلێمانی و له‌لایه‌ن لیژنه‌ی ریستۆرانته‌وه شوێنه‌كه‌ی داده‌خرێت و خاوه‌نه‌كه‌شی روبه‌رووی رێكاری یاسایی ده‌كرێته‌وه. لیژنه‌ی ریستۆرانت یه‌كێكه له لیژنه هاوبه‌شه‌كانی قائیمقامیه‌تی رۆژانه سه‌ردانی ئۆتێل و مۆتێل و رستۆرانت و كافتریاو شوێنه گه‌شتیارییه‌كان ده‌كات و له سه‌رپێچییه‌كانیان ئاگاداریان ده‌كاته‌وه، له هه‌بوونی سه‌رپێچیدا سزای ماددی ده‌درێن و به دووباره‌بوونه‌وه‌ی سه‌رپێچیه‌كه‌ی شوێنه‌كه روبه‌رووی داخستن ده‌كاته‌وه. خاك - راگه‌یاندنی قائیمقامیه‌تی سلێمانی
created by Avesta Group and powered by Microsoft Azure