تورەگەی زەرداو ئەندامێکی شێوە هەرمێییە لە جەستەی مرۆڤدا کە دەکەوێتە بەشی ڕاستی سک و لە ژێر جگەرەوە جێگیر بووە. تورەگەی زەرداو هەڵگری شلەی زەرداوە کە ئاوێتەیەکی ھاوسەنگە لە ئاو، کوڵیسترۆڵ، ترشی زەرداو، فۆسفۆلید، بۆیەی زەرداو، سۆدیوم، پوتاسیۆم و چەند کانزایەکی دیکە. شلەی زەرداو کە یارمەتی هه‌رسكردنی خواردن ئەدات لەناو جگه‌ردا دروست ده‌بێ و له تورەگەی زه‌رداودا كۆده‌بێته‌وه و له كاتی هه‌رسی خواردندا ئه‌ڕژێنرێته ناو ڕیخۆڵه‌وە. خه‌ستبونەوە و ڕه‌قبوونی بڕێك له‌و شله‌ی زه‌رداوە دەبێتە هۆی بەرهەم هاتنی بەردی زەرداو کە لەگەڵ دروستبونی چەند نیشانەیەک کە لە کەسەکەدا دەردەکەوێت و هەست بە ئازار دەکات. چ کەسانێک مەترسی زۆرتریان لەسەرە؟ - خانمان زۆرتر لە پیاوان تووش دەبن. - ئەو کەسانەی کە تەمەنییان لە سەرەوەی 40 ساڵە، بەڵام لە کەسانی گەنجیشدا دەردەکەوێ ئەگەرچی ڕێژەکەی کەمترە. - ئەو کەسانە کە ئاستی کێشیان بەرزە و قەڵەون. - خانمانی دووگیان. - ئەو کەسانە کە خواردنی پڕ چەوری و کۆلیسترۆڵ دەخۆن و کەمتر گرینگی بە خواردنی ڕیشاڵ دەدەن. - ئەو کەسانەی کەوا ئەم کێشەیە لەناو بنەماڵەکەیاندا هەیە. - تووشبوانی نەخۆشی شەکرە. - بەکارهێنەرانی هەندێک دەرمانی پزیشکی، لەوانە دەرمانەکانی هۆرمۆنی ئیسترۆژین. بە چ شێوەیەک مەترسی تووشبون کەمبکەیتەوە؟ - ژەمەکانت لە کاتی خۆیدا بخۆ و هیچ ژەمێک فەرامۆش مەکەو بۆ ماوەیەکی زۆر خۆت بە برسێتی مەهێڵەوە. - هاوسەنگی کێشی جەستەت ڕابگرە، نە خۆت زۆر لاواز کە و نە خۆت تووشی قەڵەوی بکە. - بە مەبەستی دابەزاندنی کێش، هیچ جۆرە دەرمانێک، بەبێ ڕێنمایی دوکتۆر بەکار مەهێنە. - لە وەرزش بەردەوام بە. سەرچاوە: Insider خاک _ شاهۆ
created by Avesta Group and powered by Microsoft Azure