شێرزاد حەسەن

نووسەر و ڕوناكبیر "شێرزاد حەسەن" شوێنی لە دایك بوونی ھەولێر گەرەكی خانەقایە. ساڵی لە دایك بوون دیار نییە چونكە دایك و باوكی ناكۆك بوون لەسەر ساڵی لە دایك بوونی، ھەموو جار دەبووە شەڕیان لە سەر بەرواری لە دایك بوون، یەكێكیان دەیوت كە (شێرۆ) لە دایك بوو‌ جوولەكە لە ھەولێر ڕۆشتبوو، ئەوی دیكەیان بەرپەرچی دەدایەوە دەیووت نەخێر جولەكەكان نەڕۆشتبوون، ھەر لەبەر ئەوە ساڵی لەدایك بوون دەكرێت ١٩٥١ یان ١٩٥٢بێت.


لەشاری ڕەواندز چوار ساڵی قۆناغی سەرەتایی لە قوتابخانەی پاشای گەورە خوێندووە، پاشان پۆلی شەشی سەرەتایی چوونەتەوە ھەولێر لە قوتابخانەی (ئیبن خەلەكان) بووە، تا قۆناغی بەر لە زانكۆ خوێندنی لە ھەولێر تەواو كردووە. پلەی زانستیی بەكالۆریس لە زمان و ئەدەبی ئینگلیزی/ زانكۆی بەغداد ساڵی ١٩٧٤-١٩٧٥.




خاوەنی بەكالیۆریۆسە لە زمان و ئەدەبیاتی ئینگلیزی زانكۆی بەغدا ، بۆماوەی (26) ساڵ لە بواری پەروەردەدا وەك مامۆستا و سەرپەرشتیار دەستبەكار بووە، لە ساڵی ١٩٩٤ ە وە تا حوزەیرانی ١٩٩٧ لە بەشی پەروەردە و ڕاگەیاندن لە ڕێكخراوێكی MGA كاری كرد، بۆ ماوەی ٢ ساڵیش سەرنووسەری گۆڤاری ئاوات وھێڤی بوو كە ڕێكخراوەكە دەریدەكرد بۆ منداڵان و قوتابیان، ئامانجی ئاگادار كردنەوەو هوشیاركردنەوە بوو لە بەرامبەر ترس و ھەڕەشەكانی ( مین- لوغم).بۆ ماوەی شەش ساڵ لە ڕێكخراوی (یونیسكۆ) بۆكارو باری پەروەردە كاریكردوە.


لە هاوینی ساڵی (1997) بۆ ماوەی 10 مانگ لە "فنلەندا" لە شاری (تامپێری) پەنابەر بووە ، لە بەهاری (1998) گەڕاوەتەوە بۆ كوردستان،  هەر ئەوسا لەلایەن (یانەی قەڵەم ـ پین كڵەپ) ـی جیهانی بانگێشتی دیداری ئەدەبی كراوە و تیایدا بە باسێكی ئەدەبی بەشداری كردووە ، كە تەوەری سەرەكی ئەو ساڵە بووە بەناوی (زمان و كەسایەتی نوسەر).


لە حوزەیرانی ١٩٩٨ ە وە لە ڕێكخراوی (UNESCO) كاریكردووە تاكو ساڵی ٢٠٠٣.
كاری سەرەكی پەیوەندی بە هاوكاری نێوان ڕێكخراوەكە لەگەڵ دەزگای پەروەردەی كوردستان و قۆناغی خوێندنی باڵاوە ھەبوو، ئەندامی كارای پرۆگرامەكان بوو.


لە ھاوینی ساڵی ٢٠٠٣ تا ھاوینی ٢٠٠٧ وەك سەرپەرشتیاری پسپۆڕی كاری كرد. لە مانگی ئەیلوولی ٢٠٠٧ەوە  تەكلیف كراوە بە ڕاپەڕاندنی كاروباری ڕاگەیاندن و بە و بە دوادا چوونی كێشەو گرفتەكانی پەروەردە لە پارێزگای سلێمانی..
سەرباری ئەوەی كەلە بیست ساڵی رابردوودا لە بواری بەرگری كردن لە مافی منداڵان و ژنان و پەروەردە و پاراستنی ژینگە لە كۆڕو كۆبوونەوەی زۆر بەشدار بووە لە تەك نووسین لەو بوارانەدا. سەرباری بەشداریكردن لە كۆرس و سیمیناری پەروەردەیی لە عەممان، بەریتانیا و چین.
خێزاندارە و خاوەنی سێ منداڵە. 
بەدەر لە چوار ساڵی خوێندن لە "زانكۆی بەغدا" و ساڵێكی "فنلەندا"، نیوە بە نیوە ژیانی لە نێوان هەولێر و سلێمانی دا دابەش بووە.


نووسینەكانی :


ـ تەنیایی 
ـ گوڵی ڕەش 
ـ گەڕەكی داهۆڵەكان 
ـ پیرە پەپولەكانی ئێواران
خاوەنی حەوت ڕۆمان و نۆڤڵێتە 
ـ حەسار و سەگەكانی باوكم 
ـ پێ دەشتی كارمامزە كوژراوەكان
ـ گەڕەكی داهۆڵەكان 
ـ پیرە پەپولەكانی ئێواران 
ـ تەمی سەر خەرەندە
ـ ژنێكی منگن 
ـ خەونی جاڵجاڵۆكەكان 
ـ دواهەمین شەوی دابەزینی عیسا 
ـ ژنێك بەسەر منارەوە
خاوەنی چوار كۆمەڵە ووتارە بەناوی 
ـ بێ كتێب هەڵناكەم "كۆمەڵە ووتارێكی ئەدەبی "
ـ دوژمنی گەل و مێگلیزم "كۆمەڵە ووتارێكی شانۆیی"
ـ كارگەكانی تابووت "كۆمەڵە ووتارێكی فرەتەوەر "
ـ دەرۆزەكەرانی سەربەستی "كۆمەڵە ووتارێكی فرەبابەت"
خاوەنی یەك دیوانە شیعرە بەناوی 
ـ دارشەقەكانی نیشتیمان و دوا ورتە ورتی من
خاوەنی پێنج وەرگێڕانی شانۆگەرییە 
ـ بەتوڕەیی ئاوڕێك لە ڕابردوو بدەرەوە
ـ ماڕاساد 
ـ فریشتەكە لە بابل دابەزیوە 
ـ مەرگەساتی شالییر
ـ گوندەكانی بەرەو مانگ هەڵدەكشن
خاوەنی ڕۆمانێكی وەرگێڕراوە بەناوی
ـ ژیان وا لە شوێنێكی دیكەدا
خاوەنی سێ كۆمەڵە چیرۆكی وەگێڕراوە
ـ فرمێسكەكانی كوكوختی 
ـ یادگارەكانی قەلەڕەشێك 
ـ گەنجە ئازاكەی سەر جۆلانەكە
خاوەنی كۆمەڵێك ووتاری وەگێڕراوە 
ـ لە ستایشی ئەدەبدا 
ـ جەنگاوەری ڕۆشنایی "پەیڕەو نامە"
ـ هەقتە بزانیت "ڕاگەیاندن و ڕۆژنامەگەری"
وەرگێڕان لە بواری سیاسەتدا 
ـ ڕامیاری / نوسینی كێنت مینۆك
خاوەنی كۆمەڵێك شیعری وەرگێڕراوە 
ـ قەلەڕەش و زەنگەكان
ـ باڵەكانی فریشتە 
ـ دوو ژن و دوو پیاو
وەرگێڕان له بواری دەرونناسی دا 
ـ تۆ چۆن دەبیت بە باشترین هاوڕێی خۆت 
ـ تۆ بەسەر خۆتدا زاڵیت


ئامادەكردنی: سۆزان عومەر